Ұзатылған қыздай қып жолға салған ағалар,
Намысымды қамшылап, алға салған ағалар,
Серілердің еріккен шаңын қаққан ағалар,
Жеңгейлердің желіккен бабын тапқан ағалар,
Бұл жалғанның қадірін айтпай білген ағалар,
Сары алтындай сабырын сақтай білген ағалар,
Асыл сөзін кез келген айта білген ағалар,
Ашуынан тез келген қайта білген ағалар,
Жақсы менен жаманды танып өткен ағалар,
Мұзжарғыштай көк мұзды жарып өткен ағалар,
Білмесем оң-солымды қызартқан да ағалар,
Кеңітіп тар жолымды, ұзартқан да ағалар,
Жаны жайсаң ағалар, қайтпас, қайсар ағалар,
Аға бары жақсы екен еңбегіңді бағалар.
Үлгі болар бізге де өрге тартқан қара нар,
Арманым жоқ сіздерге іні болсам, ағалар!
