«Астанада,12 қазан күні мәжілісте «Білім беру және бала құқықтарын қорғау мәселелері бойынша өзгерістер мен толықтырулар енгізу туралы» заң жобасының таныстырылымы өтті»,-деп хабарлайды QAZYR.KZ тілшісі.
Оған Әлеуметтік-мәдени даму комитетінің төрағасы Асхат Аймағамбетов жетекшілік етті. Заң жобасын таныстырған Оқу-ағарту вице-министрі Еділ Оспан түзетулер негізгі төрт бағытты қамтитынын атап өтті.
Соның бір бағыты аясында кәсіби асырап алушы отбасылар институты енгізіледі.Түзетулер Мемлекет басшысының балалар үйіндегі тәрбиеленушілер санын азайту тәжірибесін жалғастыру жөніндегі тапсырмасына қатысты қолға алынды және ол жаңа тәсілдерді әзірлеуді талап етіп отыр.
– Балалар анықталғаннан кейін балалар үйлеріне емес, бірден отбасыларға табысталады. Әрбір балаға ата-ана назар аударып, қамқорлық көрсете алуы үшін отбасындағы бала саны төрттен аспауы керек. Асырап алушы ата-ананың жасы 30-дан 53 жасқа дейінгі аралықта болады. Баланы қабылдайтын кәсіби отбасы мәртебесін алуға үміткер отбасылар психологиялық даярлықтан, қорғаншылық және қамқоршылық органдарында тіркеуден өтеді, – деді Оқу-ағарту вице-министрі.
Сондай-ақ енді отбасыларға жетім және ата-анасының қамқорлығынсыз қалған балалармен қатар, панасыз, қараусыз қалған, арнаулы әлеуметтік қолдауға мұқтаж балалар да орналастырылады. Материалдық ынталандыру үшін әрбір жетім баланы асырап-бағуға 10 АЕК мөлшерінде ай сайынғы жәрдемақы және балалардың отбасында болу мерзіміне байланысты әрбір кәсіби тәрбиешінің қызметіне – 70 АЕК ақы төлеу көзделеді. Депутат Ирина Смирнова оның өлшемін төмен бағалағанына наразылық білдірді. Ол бұл сомаға балаларды бір уақытта киіндіріп, тамақтандыру мүмкін емес екендігін және қолайсыздық тудыратынын атап өтті. Мәжілісмен төлемнің көлемін ұлғайтып, ол үшін ең төменгі күнкөріс деңгейін немесе елдегі орташа жалақыны негізге алуды ұсынды.
– Кәсіби тәрбиешілерге баланы күтіп-бағуға берілетін төлем асырап алған отбасыларға, қорғаншылық және патронаттық отбасыларға төленетін жәрдемақы мөлшерінде. Біз бұл мәселені ұзақ талқылап, отбасын құрудың барлық нысаны үшін төлемдердің мөлшері бірдей болуы керек деген шешімге келдік, – деді Еділ Оспан.
