Қазақстанда көлікті 5 минуттан артық қыздырғаны үшін салынатын айыппұлға қатысты ереже қайта қаралуы мүмкін,-деп хабарлайды Qazyr.kz тілшісі.
Әділет министрлігі бұл норманы қайта талқылау туралы шешімді депутаттардың бастамасынан кейін қабылдады. Енді мәселені мемлекеттік органдар мен депутаттардан құралған ведомствоаралық комиссия қарайтын болады.
Айыппұл мөлшері қандай?
Қолданыстағы ереже бойынша, көлікті 5 минуттан артық қыздырғаны үшін азаматтарға алғаш рет 19 660 теңге айыппұл салынады, ал бұл бұзушылық қайталанған жағдайда айыппұл мөлшері 39 320 теңгеге дейін өседі. Алайда, бұл талапқа қатысты тұрғындар мен депутаттардың наразылығы күшейіп отыр.
Неге қайта қаралады?
Қыс мезгіліндегі суық климат жағдайында көлікті қыздыруға қойылған шектеулер тұрғындардың өмір сүру жағдайын қиындатады деп есептейтін депутаттар бұл норманы әділдік тұрғысынан қайта қарауды талап етті. Олар көлікті ұзақ уақыт қыздыру қауіпсіздік пен қозғалтқыштың дұрыс жұмыс істеуі үшін қажет екенін атап өтті.
Әділет вице-министрі Ботагөз Жақселекова мәселенің нақты шешімі депутаттық сауал мен тексеру нәтижелеріне байланысты анықталатынын мәлімдеді:
«Бұл мәселе бойынша депутаттық сауал түскен жағдайда, норма қайта нақтыланып, талқыланатын болады. Ал тексеру қорытындысы бойынша соңғы шешім қабылданады», – деді ол.
Көлік иелері үшін маңызды бұл мәселе қазір қоғамдық талқылауда. Ведомствоаралық комиссияның шешімі климаттық жағдайларды ескере отырып, жаңа өзгерістер әкелуі мүмкін. Қоғам болса, ереженің әділ әрі қолайлы түрде реттелуін күтуде.
