Табиғаттың бізге жұмбақ сырлары көп таңданар,
Тағдырындай таңдар да бар мəңгі-бақи əн болар.
Күз келгенде уылжып бір піседі екен алмалар,
Алма піссе ол алманы үзіп алған жөн болар.
Үзіп алған жөн болады, шалындырмай ызғарға,
Байқап тұрсаң піскен алма секілді екен қыздар да.
Жер бетінде сұлулықтан барлық адам үміткер,
Алма бақты күндіз-түні аңдиды екен жігіттер.
Біз де аңдыдық, ажарлы мен базарлысын саралай,
Сөйтіп, бірін қағып түстік, көктігіне қарамай.
Міне, қызық енді бүгін түк көрмеген жандаймыз,
Тосын келген «ұрылардан» алма бақты қорғаймыз
Алма бетті қарындасым бой жеткелі менің де
Мазам кетті. Бір көңілсіз шырмау түсіп сенімге.
Қиын, қиын, қыз ағасы болу деген бұл бір сын,
Бағымызға қандай ұры жолығарын кім білсін?
Мұхтар Шаханов
