Алматы қаласында экологияны сақтау бағытында ауқымды шаралар жүзеге асырылуда. «Таза Қазақстан» экологиялық бағдарламасы аясында мегаполистегі жасыл желектерге биологиялық өңдеудің алғашқы кезеңі аяқталуға жақын. Бұл бастама қаланың көгал қорын зиянкестерден сақтап, тұрғындарға жайлы экожүйе қалыптастыруды көздейді.
Өңдеу жұмыстары сәуірдің 20-сынан басталып, мамырдың 30-на дейін жалғасады. Ғалымдардың кеңесімен бұл кезеңде емен ағаштарына төрт, ал теректерге екі мәрте биологиялық өңдеу жүргізілді. Мамандар препараттарды ерекше мұқият таңдап алған. Жиенбаев атындағы ғылыми-зерттеу институтының өкілі Нұржан Мұхамадиевтің айтуынша, қолданылған құралдар тек зиянкестерге әсер етіп, адам, жануар мен құсқа залалсыз. Бұл — табиғи тепе-теңдікті сақтай отырып, қаланы көркейтуге арналған тиімді амал.
Тағы бір ерекшелік — өңдеу жұмыстары түнгі уақытта жүргізіледі. Бұл кезде күн сәулесінің болмауы препараттың баяу сіңіп, ұзақ әсер етуіне мүмкіндік береді. Жыл соңына дейін төрт кезең жоспарланған:
- маусымның 1-30 аралығы — екінші кезең,
- шілденің 5-інен тамыздың 5-іне дейін — үшінші кезең,
- соңғы кезең тамыздың 15-інен қыркүйектің 20-сына дейін жалғасады.
Алматы қаласының Экология және қоршаған орта басқармасының мәліметінше, бұл жолы 2,3 миллионнан астам жасыл желек қамтылады. Бас маман Миржан Багатиев барлық шаралар ауа райы мен ғылыми ұсынымдарға сәйкес іске асырылып жатқанын атап өтті. «Жасыл желек — қаланың өкпесі. Біз оны сақтау арқылы келешек ұрпаққа таза ауа қалдырамыз», — дейді ол.
Қолданылып жатқан барлық препараттар сертификатталған және еліміздің климаттық жағдайына бейімделген. Кейбір жағдайларда П-4 санатындағы төмен қауіптілік дәрежесіне ие химиялық құралдар да пайдаланылуда.
