Қазақ әдебиетінің алып бәйтерегі, халық жазушысы Мұхтар Мағауиннің жеті күндік асы Астана қаласында өтті. Асты Қазақстан Жазушылар одағының Астанадағы филиалы, қаламгердің жақын достары, туыстары және шығармашылық жолдастары ұйымдастырды.Бұны Qazyr.kz хабарлайды.
Бұл шараға жазушының туған-туыстары, қазақ ақын-жазушылары, ел парламентінің депутаттары, қоғам қайраткерлері мен қарапайым оқырмандары жиналды. Мұхтар Мағауиннің шығармашылығын жоғары бағалайтын ел азаматтары оның рухына тағзым етіп, өмірі мен әдеби мұрасы жайлы естеліктерімен бөлісті.
Астың барысында Мұхтар Мағауиннің қазақ әдебиетіне сіңірген еңбегі ерекше аталып өтті. Жазушының ұлттық руханиятты көтерудегі орны мен шығармалары арқылы ұлт тарихын, мәдениетін, болмысын танытудағы еңбегі жайлы жылы сөздер айтылды.
Мұхтар Мағауиннің мұрасы – ұлт қазынасы
Мұхтар Мағауин қазақ әдебиетінің алтын қорына кірген жүздеген шығарманың авторы. Оның «Аласапыран», «Көк мұнар», «Шыңғыс хан» секілді романдары мен әңгімелері оқырмандар жүрегінен орын алып, ұлт руханиятының айнасына айналды. Жазушы өз еңбектерінде қазақ халқының тарихын тереңнен қозғап, ұлттық құндылықтарды сақтаудың маңыздылығын ерекше көрсете білді.
Қазақ руханиятының дамуына өлшеусіз үлес қосқан тұлғаны еске алу шарасы еліміздің мәдени өміріндегі маңызды оқиғалардың бірі болды. Қатысушылар Мұхтар Мағауиннің есімі мен шығармашылығы мәңгілік екенін, оның еңбектері болашақ ұрпаққа мұра болып қалатынын атап өтті.
Бұл ас руханияттың өлмейтінін, ұлы тұлғалардың еңбегі мен есімі ел жадында мәңгі сақталатынын тағы бір дәлелдеді.
