Қазақстанда 5 сәуірден бастап мопедтерді ресми тіркеледі,деп хабарлайды Qazyr.kz
Қазақстанда 2025 жылдың 5 сәуірінен бастап мопедтерді міндетті түрде ресми тіркеу ережесі күшіне енеді. Бұл шешім жол қозғалысының қауіпсіздігін арттыру, мопед иелерінің жауапкершілігін заңды түрде бекіту және көлік құралдарының есебін ретке келтіру мақсатында қабылданды. Осыған байланысты мопед иелері бірқатар рәсімдерден өтіп, қажетті құжаттарды дайындауы қажет.
Мопедті тіркеу үшін қандай құжаттар керек?
1. Жүргізуші куәлігі:
Мопедті жүргізуге рұқсат беретін А1, А немесе В санатындағы жүргізуші куәлігі болуы шарт. Егер мұндай куәлігіңіз жоқ болса, оны алу үшін арнайы емтихандар тапсыру қажет.
2. Жеке куәлік:
Қазақстан Республикасының азаматтары жеке басын куәландыратын құжатты ұсынуы тиіс. Қазіргі таңда құжатты электронды түрде ұсынуға мүмкіндік бар.
3. Мопедтің техникалық құжаты немесе сипаттамалары:
Мопедтің зауыттық сипаттамалары көрсетілген құжаттар. Егер мопед жаңа болса, оны сатып алған кезде берілетін техникалық паспорт немесе түбіртекті ұсыну жеткілікті.
Тіркеу тәртібі
Мопедті тіркеу үшін тұрғылықты жері бойынша мамандандырылған халыққа қызмет көрсету орталығына (ХҚКО) бару қажет. Процедура келесі қадамдарды қамтиды:
1. Өтініш толтыру:
Тіркеуге қажетті өтініш нысанын толтырып, оны орталықтың қызметкерлеріне тапсыру керек.
2. Техникалық тексеру:
Мопедтің техникалық жағдайын тексеру міндетті. Бұл шара оның қауіпсіздігіне көз жеткізу үшін қажет.
3. Азаматтық жауапкершілікті сақтандыру полисін рәсімдеу:
Мопед иесі жол қозғалысы кезінде үшінші тараптарға келтірілген зиян үшін жауапкершілік алатынын дәлелдеу мақсатында сақтандыру рәсімдеуі керек.
4. Мемлекеттік баж салығын төлеу:
Тіркеу үшін қажетті мемлекеттік алымдарды төлеу керек. Бұл төлемдердің мөлшері мопедтің сипаттамаларына байланысты өзгеруі мүмкін.
Тіркеу процесінің маңызы
Мопедтерді ресми тіркеу жол қозғалысына қатысушылардың қауіпсіздігін қамтамасыз етуге және жол-көлік оқиғаларына қатысты мәселелерді жедел шешуге мүмкіндік береді. Сонымен қатар, тіркелген мопедтер ұрлық немесе заңсыз пайдалану жағдайында иесін анықтауды жеңілдетеді.
Асыл ҮМІТҰЛЫ
