Еліміз Румыния, Мажарстан және Қытайда жүк терминалдарын салу мәселесін қарастырып жатыр. Бұл туралы Көлік министрлігінің Теміржол және су көлігі комитеті төрағасының орынбасары Нұржан Келбуғанов айтты деп хабарлайды Qazyr.kz.
— Қазақстанның шетелдегі жүк қалыптастыру нүктелері географиясын кеңейту бойынша шаралар қабылданып жатыр. Қазіргі уақытта Ляньюньган портында және Сиань қаласының құрғақ портында Қазақстан-Қытай терминалдары жұмыс істеп тұр. Сондай-ақ қазақстандық жеке сектор Поти портында терминал салды, — деді ол Орталық коммуникациялар қызметіндегі брифингте.
Комитет төрағасы орынбасарының мәліметінше, қазіргі таңда Алят портында, Мәскеу маңындағы Селятино стансасында, Беларусьтегі Свислочь стансасында және Ташкентте терминалдар салынып жатыр. Олардың жалпы қуаттылығы жылына 1 млн-нан астам контейнерді құрайды.
— Болашақта Румыния, Мажарстан (Будапешт) және Қытайдың Үрімші (ШҰАР) қаласында бірлескен терминалдар ұйымдастыру мәселесі қарастырылып жатыр. Жалпы алғанда, сыртқы терминалдық қуаттар 4 есеге өсіп, жылына 2 млн 500 мың контейнерге жетеді. Бұл өз кезегінде жүк ағындарын көлік инфрақұрылымымызға тартуға мүмкіндік береді. Осы жасалып жатқан жобалардың арқасында транзит 3 есеге артып, 76 млн-ға жететін болады. Бұл еліміздің көліктік-транзиттік әлеуетінің дамуына үлкен үлес қосады, — деді Нұржан Келбұғанов.
