Қазақстан Үкіметінің отырысында Премьер-Министр Олжас Бектеновтың төрағалығымен газ саласының дамуы мен цифрландыру мәселелері қаралды. Жиын барысында энергетика министрі Ерлан Аккенженов, QazaqGaz компаниясының басқарма төрағасы Санжар Жаркешов және цифрлық даму, инновациялар және аэроғарыш өнеркәсібі министрлігінің бірінші вице-министрі Қаныш Төлеушин баяндама жасады деп хабарлайды Qazyr.kz
Энергетика министрлігінің мәліметінше, 2024 жылы Қазақстанда 59 млрд текше метр газ өндірілген. Оның 85%-ы Қарашығанақ, Теңіз және Қашаған сияқты үш ірі кен орнынан алынған. Тауарлық газ өндіру көлемі 28,7 млрд текше метрге жетсе, 2025 жылға жоспар – 29,4 млрд текше метр.
Премьер-Министр табиғи газдың әлемде экологиялық жағынан ең тиімді отын түрі ретінде сұранысқа ие болып отырғанын атап өтті. Оның айтуынша, газ – Қазақстан үшін әлеуметтік маңызы жоғары ресурс. Ол азаматтардың өмір сапасына, экономиканың тұрақтылығына және өңірлердің дамуына тікелей әсер етеді.
Президент Қасым-Жомарт Тоқаев газ саласын дамыту қажеттігін бірнеше рет атап өтіп, халықты сенімді газбен қамтамасыз ету, инфрақұрылымды жаңғырту және жаңа кен орындарын барлау бойынша тапсырмалар берген болатын. Бүгінде еліміздің газ қоры шамамен 4 трлн текше метрді құрайды. Алайда бұл ресурстарды игеру үшін жүйелі тәсіл, инвестициялар, заманауи инфрақұрылым және ұзақмерзімді стратегия қажет.
Жиында жер қойнауын зерттеудің ғылыми базасын жаңарту және геологиялық ақпаратты цифрландырудың маңыздылығы айтылды. Бұл бағытта өнеркәсіп және құрылыс, энергетика министрліктері бірыңғай жер қойнауын пайдалануға арналған платформа әзірлеуде. Онда мемлекеттік органдар мен кәсіпорындар арасындағы өзара әрекеттестік үшін бірыңғай терезе және кен орындарының цифрлық картасы қамтылатын болады.
Сонымен қатар, газ өңдеу зауыттарын жедел салу маңызды бағыт ретінде белгіленді. Бұл жобалар өнімнің қосымша құнын арттырып қана қоймай, газ импортына тәуелділікті азайтуға және байланысты салаларды жүктеуге мүмкіндік береді.
