Қазақстан Республикасының Президенті Қасым-Жомарт Тоқаев 9 мамырда Мәскеуде өтетін Ұлы Жеңістің 80 жылдығына арналған салтанатты іс-шараға қатысады. Бұл туралы Қазақстанның Ресей Федерациясындағы елшісі Дәурен Абаев мәлімдеді.Бұл туралы Qazyr.kz.
Президенттің бұл сапары Қазақстан мен Ресей арасындағы тарихи байланыстарды нығайтуға және Екінші дүниежүзілік соғыстағы қазақстандық жауынгерлердің ерлігін еске алуға бағытталған. Тоқаев Мәскеуде өтетін салтанатты шеруге қатысып, Ресей басшылығымен кездесуі мүмкін.
Мемлекет басшысы сапар аясында Тверь облысындағы Ржев мемориалына барады. Бұл жерде Ұлы Отан соғысы кезінде 100-ші және 101-ші қазақ атқыштар дивизиялары шайқасқан. Қазақстандық жауынгерлердің ерлігін ұлықтау мақсатында Президент олардың рухына тағзым етеді.
Сонымен қатар, Президент Ресейдің Трубино деревнясындағы бауырластар зиратына барып, өз атасының ағасы Қасым Болтаевтың рухына құрмет көрсетеді. Ол Ұлы Отан соғысы кезінде майданда қаза тапқан.
Сапар аясында Тоқаев Ресейдің жоғары лауазымды тұлғаларымен кездесуі мүмкін. Бұған дейін ол Ресейдің премьер-министрі Михаил Мишустинмен келіссөздер өткізіп, екі ел арасындағы экономикалық және саяси ынтымақтастықты одан әрі дамытуға ниетті екенін мәлімдеген болатын.
Қазақстан Президентінің Мәскеуге сапары тарихи маңызы бар шара болып отыр. Бұл Жеңістің 80 жылдығына арналған маңызды жиын ғана емес, сонымен бірге Қазақстанның соғысқа қосқан үлесін еске салу және екі ел арасындағы достықты нығайтуға бағытталған қадам болмақ.
