ҚР Парламенті Сенаты үлескерлердің құқықтарын қорғауға арналған заң жобасын екі оқылымда бірден мақұлдап, Президенттің қарауына жіберді. Жаңа заң үлестік құрылыс саласындағы азаматтардың мүдделерін қорғауға бағытталған және бірнеше маңызды өзгерісті қамтиды деп хабарлайды Qazyr.kz
Заңдағы басты жаңалықтардың бірі – салынып жатқан тұрғын үйлерден пәтер сатып алу үшін алдын ала шарт жасасуға тыйым салу. Бұған қоса, төмендегі шектеулер де енгізіледі:
Үлескерлердің ақшасын тартуға рұқсатсыз жарнама жасауға тыйым салынады;
Үлескерлердің қаражатын тартудың заңдылығын әкімдіктер бақылауға алады;
Салынып жатқан тұрғын үйден ипотека арқылы мүлік сатып алуға болмайды;
Тек қолма-қол ақшасыз мәмілелерге ғана рұқсат етіледі;
Құрылыстың ұзартылу мерзімі 9 айдан 5 айға дейін қысқарды.
Осы талаптарды бұзған құрылыс компанияларына 7 миллион теңгеге дейін айыппұл салу көзделген. Бұл үшін Әкімшілік құқық бұзушылық туралы кодекске де өзгерістер енгізіледі.
Сонымен қатар заңда құрылыс компанияларына белгілі бір жеңілдіктер де қарастырылған. Мысалы, көппәтерлі үйдің қаңқасын толығымен аяқтамай-ақ, жергілікті атқарушы органның рұқсатын алғаннан кейін үлескерлердің ақшасын пайдалануға рұқсат беріледі. Бұл құрылыс компанияларына қаржылық икемділік берсе, мемлекеттік бақылау механизмдері сақталады.
Халықтың мүддесін қорғау мақсатында Үлескерлерді қолдау орталығы құрылатын болды. Бұл орталық азаматтарға тұрғын үйді қауіпсіз сатып алу жолдары туралы кеңес беріп, ақпараттық қолдау көрсетеді.
Жаңа заң жобасы тұрғын үй нарығындағы сенімділікті арттырып, азаматтардың үлестік құрылыс саласына деген сенімін нығайтуды көздейді. Сенаттың бастамасымен қабылданған бұл құжат үлескерлердің қауіпсіздігін арттырып, құрылыс саласындағы заңбұзушылықтардың алдын алуға мүмкіндік береді.
