Астанада кәмелетке толмағандарға ЛГБТ насихатының ықпалы туралы зерттеу қорытындылары талқыланды деп хабарлайды Qazyr.kz
2025 жылғы 30 шілдеде Астана қаласында сарапшылар мен ғылыми қауымдастық өкілдерінің қатысуымен кәмелетке толмағандарға ЛГБТ насихатының ықпалына арналған зерттеу қорытындылары талқыланды. Іс-шара ҚР Парламенті Мәжілісінің бастамасымен, 2024 жылғы 6 тамызда қаралған «Біз Қазақстан Республикасында ЛГБТ-ның ашық және жасырын насихатына қарсымыз» атты петиция негізінде ұйымдастырылды.
Зерттеу жұмысын «Өркендеуге жәрдемдесудің Ұлттық қоры» қоғамдық қоры үйлестіріп, сарапшылар мен зерттеу ұйымдарының қатысуымен жүргізілді. Зерттеу барысында әлеуметтанулық сауалнамалар мен ғылыми-құқықтық талдаулар жасалып, халықаралық тәжірибе де ескерілді.
Сарапшылар пікірінше, ЛГБТ тақырыбындағы ақпаратты жиі тұтынатын жасөспірімдер арасында жыныстық және гендерлік сәйкестікке қатысты ішкі шатасу мен мазасыздық байқалуы мүмкін. Цифрлық кеңістік бұл мәселеде шешуші рөл атқарып отыр: жасөспірімдердің 63,7%-ы ЛГБТ туралы ақпаратты әлеуметтік желілерден алатынын көрсетсе, дәстүрлі БАҚ бұл жағынан екінші орында қалды (42,6%).
Психикалық денсаулық саласының мамандары мұндай мазмұнға жиі ұшырау:
эмоционалдық тұрақсыздыққа,
әлеуметтік оқшаулануға,
өзін-өзі анықтау үдерісінің күрделенуіне себеп болуы мүмкін екенін атап өтті.
Сондай-ақ, зерттеу барысында балаларға арналған мультфильмдер мен кітаптарда дәстүрлі емес қатынастарды жанама түрде заңдастыру тенденциялары байқалған. Бұл жасөспірімдердің психологиялық тұрақтылығына теріс әсер етуі мүмкін.
Мәліметтерге сәйкес, зерттеу кезеңінде әлеуметтік медиада ЛГБТ тақырыбына арналған 1500-ден астам материал тіркелген. Бұған қоса, блогерлер мен инфлюенсерлердің осы саладағы белсенділігі өсіп келе жатқаны байқалады.
Қорытынды есеп ҚР Парламенті мен уәкілетті органдарға жолданды және балалардың құқықтары мен әл-ауқатын қорғау саласындағы саясатты жетілдіруде ескерілетін болады. Осы тақырыптағы қоғамдық талқылаулар Парламент қабырғасында 2025 жылғы қыркүйекте жалғасады деп жоспарланып отыр.
