Ызыңдаған шыбыннан бал дəметкен заман -ай
Бай болса да кедейден мал дəметкен заман -ай
Жиырмадағы сылқымды шал дəметкен заман -ай
Шабан озып жүйріктен алға кеткен заман -ай
Атағы асып кейбірдің айға жеткен заман -ай
Бұрынғының тəртібі қайда кеткен заман -ай
Елудегі ағаны бойдақ еткен заман -ай
Ер тұрманды жүйрікті жайдақ еткен заман -ай
Енесінен келіні шай дəметкен заман -ай
Қырыққа кеп қыз əрең байға кеткен заман -ай
Көп адамдар тек байлық ойлап өткен заман-ай
Тойымсыздар екі ұртын майлап өткен заман-ай
Мөлдір қайнар бастауға қақ тұратын заман -ай
Жақынынан сескеніп сақ тұратын заман -ай
Шарананы қоқысқа лақтыратын заман -ай
Жас жеткіншек кəріні жаққа ұратын заман-ай.
Ағайынға ағайын қас қылатын заман -ай,
Дұшпан болып табалап басқа ұратын заман-ай
Жақсыдан көп жамандар сап құратын заман-ай
Жала жауып нақақтан жаптыратын заман-ай
Күре жолды тар етіп тайғақ қылған заман -ай
Алаяқты шақырып айғақ қылған заман-ай
Жомарт қолын жоқшылық байлап тұрған заман-ай
Бұлбұл үнсіз қораздар сайрап тұрған заман-ай.
Сұмыраймен сұмдарға атақ ерген заман-ай
Мансапқорлар қауымға бата берген заман-ай
Жалқау жандар сылтау қып жата берген заман -ай
Адалдардың артынан шатақ ерген заман-ай