Жарлының байлығы,
Денінің саулығы.
***
Демі бардың – емі бар.
***
Аш кісі – ұрысқақ,
Ауру кісі – тырысқақ.
***
Бірінші байлық – денсаулық,
Екінші байлық – он саулық,
Үшінші байлық – ақ жаулық.
***
Денсаулықтың қадірін,
Ауырғанда білерсің.
***
Ауруын жасырған өледі.
***
Ауру кісі күлкі сүймес,
Ауыр жүкті жылқы сүймес.
***
Тазалық – саулық негізі,
Саулық – байлық негізі.
***
Туа мүкіс жазылмас.
***
Лас адам – кіршіл,
Надан адам – діншіл.
***
Көп ауырған ем табады,
Көп адасқан жол табады.
***
Дәрі шөптен шығады,
Дана көптен шығады.
***
Аурудың жақсысы жоқ,
Дәрінің тәттісі жоқ.
***
Ауру жүйкені бұзады,
Жүйке ұйқыны бұзады.
***
Қайталанған дерт жаман,
Қайта бұзылған серт жаман.
***
Ауырып ем іздегенше,
Ауырмайтын жол ізде.
***
Көзің ауырса қолыңды тый,
Ішің ауырса аузыңды тый.
***
Ауырып, жазылған жан олжа,
Жоғалып, табылған мал олжа.
***
Бас аманда мал тәтті,
Бас ауырса, жан тәтті.
