Таусылмайтын арман бар
…Бар санамды оймен жаулап алғандар!…
Жүрегімде таусылмайтын арман бар.
Бірде олай, бірде бұлай өзгерсем,
Мінезіме таң-тамаша болмаңдар.
Жақсылықтан өзгеремін жайылып,
Жан-жарасы емделгендей , айығып.
Жамандықтан жаным жылап баладай,
Жасып қалам, өз-өзімнен қамығып.
Сұлулықтан нәр аламын сүйемін,
Өмір кілті тек Махаббат білемін.
Жаны сұлу, тәні сұлу арудай,
Мөлдір таза болсын менің жүрегім.
Табиғаттай құбылады мінезім,
Билегенде жүрегімді бір сезім.
… Киялыммен шарлап кетем әлемді…
Шабыт билеп арпалысқан , бұл – кезім.
Кейде көңіл жайылады даладай,
Дос па, дұшпан?… Кім болсада қарамай.
Шын жүрекпен күле алатын күнәсіз,
Менің жаным-сәби жаны- баладай.
Сәуле Шәмшіғали. 17.04.22.
