«Афоризм» атты қолжазбамыздан бірер Сөз
САЙТАН ТУРАЛЫ
- ** Сайтанның басты бір белгісі — көзбояушылық. Екі мағынасында да.
** Сайтан қауіпті емес. Ол қаншалықты зәлім болса да, — бірбеткей. Бірден танисың оны. Пенделер қауіпті. Өйткені, олар екіжүзді.
** Сайтаннан сабақ алмасаң, ешқашан саналы бола алмайсың.
Жасасын Сайтан!
** Сайтанның бес қаруы бар:
озбыр билік, аяр саясат, арсыз сауда, басқыншы соғыс, сұлу ұрғашылық.
** «Сайтан — түтінсіз оттан жаралды» догмасы — бос сөз. «Ол сасық су мен сасық топырақтан жаралған». Ал, оттан таза ештеме жоқ.
** Сайтанның сыбайласы — санада..
** Сайтанның екі ұстанымы бар.
Біріншісі — «Өзің білме, білгеннің тілін алма!». Екіншісі — «Жалғыз жүріп жол тапқанша, көппен бірге адас!».
** Сайтанның даму жолы — материалдық-техникалық үдеріс.
** Сайтан құралдарының бірі — алуан техника. Адамдық сана қабілетінің барша қыры ашылғанда, ол техникасының бәрі адыра қалады.
** Сайтандардың пірі — Қара Шаш Елті.
** Мүңкір гармония — Сайтан мұраты.
** Өмір көңілді болу үшін, сайтандық та керек аздаған.
** Сайтан Періштеге айналса да, ұрғашылығы өзгермейді.
** Сайтан тұзынсыз, періште көжесінің де дәмі кірмейді.
** Түптеп келгенде, бәріміз де — періште бола алмай жүрген сайтанбыз.
Періштесі мен Сайтаны «итжығыс» жан — пенде..
** Періштенің Сайтансыз күні жоқ.
Сайтанға да дәл солай.
** Сайтанмен күрес мәңгі бітпейді, жұпар жарасым амалын іздемесең.
** Көсеге мен көңіл қошынан жаратылған жұпар ән — Сайтанды да еңіретеді.
** Көңілі ұдайы қош аңқыған сайтан ғана — жұпар гармонияның кепілі.
** «Алпыс екі айла» — Сайтандікі. Қарсы екі «амал»: «Сайтан өнерін үйрене жирену» және «Сайтанды періштелік өнермен еліктіріп әкету».
** Сайтанды өзіңнің адамдық жұпарыңмен үнемі еліктіре-елтіте білсең, ол да жұпарланып, сенің адал жарыңа айналады.
