Сабыр керек жыласаң да, күлсең де,
Адам деген ұлылық бар, біл сен де.
Тегіс жолда-ақ сүрінуің қас қағым,
Аяғыңды аңлап басып жүрсең де.
Сабыр керек қуанышың ба, қайғың ба,
Әрбір іске сабырлы бол, қайғырма.
Жарық ай деп жырға қанша қоссақ та,
Қараңғысы боларын біл айдың да.
Сабыр керек мына өтпелі кезеңде,
Тарықтым деп, зарықтым деп безерме.
Таршылықтың арты болар молшылық,
Кейде ортайып, кейде тасиды өзен де.
Сабыр керек уақытша нарыққа,
Заман өзі келтіреді қалыпқа
Қымбатшылық тас боп қатып қалмайды,
Билік күші тұрған кезде халықта.
