Қазақстанның паспорты екі саты көтеріліп, Global Passport Power Rank 2025 рейтингінде 52-орынды иеленді, деп хабарлайды Qazyr.kz.
Өткен жылы, 2024 жылы, Қазақстан бұл рейтингте 54-орында болған еді.
Рейтинг мәліметтеріне сәйкес, Қазақстан азаматтары 46 бағыт бойынша визасыз саяхаттай алады, ал тағы 50 елде визаны шекарада алуға болады. Қалған 102 мемлекетке құжаттарды алдын ала рәсімдеу қажет. Осылайша, Қазақстан паспортының мобильділік көрсеткіші 95 баллды құрайды.
Биылғы жылы ең күшті паспорттар рейтингісінің көшбасшысы болып БАӘ танылды. Бұл елдің азаматтары әлем бойынша 133 бағытқа визасыз бара алады.
Екінші орында Испания, оның көрсеткіші — 179 балл.
Үшінші орынды 14 Еуропа елі бөлісті, олардың қатарында Финляндия, Франция, Германия, Бельгия, Италия, Дания, Нидерланд, Люксембург, Австрия, Португалия, Швейцария, Норвегия, Грекия және Ирландия бар.
Рейтингтің соңғы орындарында Сомали, Ирак, Ауғанстан және Сирия тұр.
