Қазақстандық ғалымдар онкологиялық ауруларды емдеуге арналған инновациялық препарат жасап, оны тіркеуге дайындық жүргізуде. Бұл туралы Үкіметтің кеңейтілген отырысында Премьер-Министр Олжас Бектенов мәлімдеді.Бұл туралы Қазір тілшісі хабарлайды.
«Ғалымдар әзірлеген бұл дәрі-дәрмек қазіргі уақытта клиникалық сынақтардың екінші фазасынан өтуде. Сынақтар сәтті аяқталған жағдайда, препаратты биылғы жылдың соңына дейін тіркеу жоспарланып отыр», – деді Бектенов.
Сондай-ақ, онкологиялық ауруларды ерте анықтау үшін скринингтік тексерулер ауқымы едәуір кеңейтілген. Бір жыл ішінде онкологиялық скринингтен 2 миллион 800 мың адам өтіп, нәтижесінде қатерлі ісікке байланысты өлім-жітім көрсеткіші 3,5%-ға төмендеген.
«Скрининг арқылы ауруды ерте диагностикалау жұмыстары 38%-ға артты. Бұл бағытта маңызды нәтижелерге қол жеткізілді», – деп атап өтті Премьер-Министр.
Ғалымдардың жаңа препараты мен ерте диагностика бойынша жүргізілген шаралар онкологиялық ауруларға қарсы күресте Қазақстанның елеулі жетістіктерге жетіп жатқанын көрсетеді.
