Қазақстанда 2023 жылдың қорытындысын талқылаған Үкіметтің кеңейтілген отырысында Премьер-министр Олжас Бектенов ел экономикасының негізгі салаларындағы жетістіктер мен көрсеткіштер туралы баяндады, деп жазады Qazyr.kz.
Мәселен, өткен жылы 29 ірі зауыт салынып, ауыл шаруашылығы, көлік және тұрғын үй құрылысы салаларында бірқатар ілгерілеу байқалған.
Премьер-министрдің мәліметіне сүйенсек, Қостанай облысында шойын құю, Алматы облысында вольфрам мен жылу оқшаулағыш материалдар шығаратын кәсіпорындар іске қосылған. Сондай-ақ Шымкент қаласында бағалы металдарды өңдеу, Қарағанды облысында катодты мыс, автомобиль шиналары мен тұрмыстық техника шығаратын зауыттар бой көтерген.
“Саран қаласында заманауи өндірістердің іске қосылуы оның моноқала мәртебесінен шығып, жаңа даму сатысына көтерілуіне жол ашты”, – деді Премьер-министр.
Былтыр 26 млн тоннадан астам астық, 3 млн тоннадан астам майлы дақылдар жиналып, 4 млн тонна астық экспортқа жөнелтілген. Бұл туралы Бектенов:
“Егіншілерді суармалы сумен толық қамтуға басымдық берілді. Арал теңізіне 2,6 млрд текше метр су жіберілді, бұл орташа жылдық көрсеткіштен едәуір жоғары”, – деп атап өтті.
Сонымен қатар 80 су арнасын жаңғырту жұмыстары аяқталып, су үнемдеу технологиялары қолданылған егістік көлемі 1,5 есеге (470 мың гектарға дейін) ұлғайды.
19 млн шаршы метр тұрғын үй салынып, денсаулық сақтау саласында 397, білім беру саласында 298 нысан пайдалануға берілді. Студенттерге арналған 40 жатақхана (11 мың орын) ашылған.
Жүк тасымалының көлемі 10%-ға өсіп, 1 млрд тоннаға жетті. Транскаспий халықаралық көлік бағыты бойынша контейнерлік тасымал 2,7 есе артты.
Құрылыс пен жөндеу жұмыстары 12 мың шақырым автомобиль жолын және 2 800 шақырым теміржолды қамтыды.
Алматы, Қызылорда және Шымкент әуежайларында жаңа үш терминал іске қосылды. Бұған қоса, Премьер-министр былтыр қосымша 300 мыңнан астам адам газ желісіне қосылғанын, 200 мыңнан астам тұрғынның орталықтандырылған су жүйесіне қол жеткізгенін айтты.
Жалпы 542 шақырым жылу желілері, 55 жылу көзі жаңғыртылып, 6,5 мың шақырым инженерлік желі жөнделді.
Жалпы 700 МВт-тан астам қосымша электр қуаты өндіріске қосылды. Премьер-министрдің айтуынша, Инвестициялық штабта құны 50 млрд доллар болатын 115 жоба талқыланып, олардың проблемалық тұстары тез арада шешімін тапқан.
“Инвестициялық штаб іс мүддесін назарға алып, бюрократиялық кедергілерге қарамастан, елге қажетті жобаларды дер кезінде бастауға мүмкіндік беретін шешімдер қабылдауда”, – дейді Бектенов.
Оның мәлімдеуінше, қазіргі кезде 97 түзету бойынша заңнамалық өзгерістер әзірленіп жатыр. Олар іскерлік ахуалды жақсарту үшін нақты мәселелерге тікелей бағытталады.
Сарапшылардың пікірінше, Қазақстан экономиканың түрлі секторларын дамыта отырып, инфрақұрылымды нығайтуға ден қойса, алдағы уақытта өндіріс пен экспорттағы жетістіктерді одан әрі арттыра алады. Үкімет бұл үрдісті жалғастыруға ниетті екенін көрсетті.
