Қазақстанда «Ұлттық қор – балаларға» бағдарламасы аясында 2025 жылғы төлемдер жүргізілді. Жоба қатысушылары – 18 жасқа дейінгі балалардың шотына әрқайсына 129,38 доллар көлемінде қаражат аударылды. Жалпы төленген сома 888,8 миллион долларды құрады.
Қаражаттың қалыптасуы және жинақталуы
Аударылатын қаражат көлемі Ұлттық қордың шетел валютасындағы активтері мен оның ұзақмерзімді инвестициялық табысына байланысты анықталады. Осы табыстың жартысы балалардың шотына аударылады. Сонымен қатар, бұл қаражат Ұлттық қордың инвестициялық портфелінде сақталып, қосымша табыс әкеледі.
Бағдарлама іске қосылғаннан бері, яғни екі жыл ішінде әр балаға жалпы 232,94 доллар жинақталды.
Бағдарлама қалай іске асады?
«Ұлттық қор – балаларға» бағдарламасы 2024 жылы іске қосылған болатын. Алғашқы жылы әр балаға 100,52 доллар көлемінде төлем жүргізілді. 2025 жылы бұл сома 28,86 доллар өсіп, 129,38 долларды құрады.
Бағдарламаның басты мақсаты – балалардың болашағына қаржылық негіз қалыптастыру. Жиналған қаражат 18 жасқа толғанда ғана пайдалануға қолжетімді болады.
2025 жылғы 31 қаңтардан бастап төлемдер туралы ақпаратты eGov mobile мобильді қосымшасы мен kids.enpf.kz сайтынан тексеруге болады.
