Алматы облысында жоғалған әскери тікұшақты іздеу жұмыстары әлі де тоқтаған жоқ. Бұл жөнінде Төтенше жағдайлар вице-министрі Кеген Тұрсынбаев мәлім етті, деп хабарлайды Qazyr.kz.
Іздеу жұмыстары 2025 жылғы 25 шілдеден бері жүргізілуде. Дәл сол күні Қорғаныс министрлігі тікұшақтың Отырар ауданы маңында жоғалғаны туралы хабарлаған.
«Біз тікұшақтар арқылы белгіленген бағытты шолып өттік. Сорбұлақ су қоймасы мұқият зерттелді. «Қазкосмос» түсірген спутниктік суреттерде жанар-жағармай іздеріне ұқсас белгілер байқалды. Су қоймасына жақын жерден тікұшаққа тиесілі бірнеше фрагмент табылды. Осыдан кейін арнайы штаб құрылып, белсенді іздеу жұмыстары басталды», – деді Кеген Тұрсынбаев.
Вице-министрдің айтуынша, тікұшақ жоғалғанына 10 күннен астам уақыт өткен. Қазіргі уақытта іздеу аймағының шамамен 50 пайызы толық зерттеліп болды. Операция Қорғаныс министрлігінің тікелей басшылығымен жүзеге асуда.
Іздеуге Төтенше жағдайлар министрлігінің құтқару күштері мен техникалық ресурстары да тартылған. Іздеу жұмыстары күнделікті таңғы уақыттан кешке дейін жүргізіледі.
«Сорбұлақ су қоймасының тереңдігі 5 метрден 25 метрге дейін жетеді. Оның түбі батпақ және лайлы, кей жерде 1 метр тереңдіктің өзінде ештеңе көрінбейді», – деп нақтылады вице-министр.
Құзырлы органдар іздеу жұмыстарын тоқтатпай, барлық мүмкін болатын бағыттар бойынша тексеруді жалғастырып жатыр.
