Қазақстанда Балалардың әл-ауқаты индексі бойынша жүргізілген әлеуметтік зерттеу балалардың құқықтық қорғалуы мен өмір сапасының жақсарып келе жатқанын көрсетті.
Зерттеуге балалар, ата-аналар және педагогтер қатысқан. Қорытынды бойынша, балалардың құқықтық қорғалуының орташа деңгейі 90,3%-ды құрады. Бұл олардың өз құқықтары туралы хабардарлығын және қажет болған жағдайда қорғау тетіктерін пайдалана алатынын аңғартады. Ең жоғары көрсеткіштерді Қостанай (94,5%), Маңғыстау (93,5%) және Қызылорда (93,1%) облыстары көрсетті.
Балалардың өміріне қанағаттану деңгейі де маңызды көрсеткіштердің бірі болып табылады. Орта есеппен 10–18 жас аралығындағы жасөспірімдердің 85%-ы өзінің әлеуметтік және психологиялық жағдайына оң баға берген. Қостанай облысы (90,1%), Шымкент қаласы (88,7%) және Қызылорда облысы (88,5%) алдыңғы қатарға шықты.
Зерттеу барысында отбасы ішіндегі сенім деңгейіне ерекше көңіл бөлінді. Жасөспірімдердің 90,4%-ы ата-анасымен ашық сөйлесе алатынын айтқан. Бұл тұрғыда Ұлытау облысы (97,5%), Астана қаласы (95,3%) және Қостанай облысы (94,7%) жоғары нәтиже көрсетті.
ҚР Оқу-ағарту министрлігі Балалардың құқықтарын қорғау комитетінің төрайымы Насымжан Оспанова зерттеу нәтижесіне тоқталып:
«Балалар әл-ауқаты индексі – баланың денсаулығы, білімі, отбасы және әлеуметтік ортасын қамтитын маңызды көрсеткіш. Біздің мақсатымыз – ең алдымен балалардың өз үнін есту. Зерттеу нәтижелері олардың өздерін қауіпсіз сезінетінін, ата-анасымен жақсы қарым-қатынаста екенін және болашағына сеніммен қарайтынын көрсетіп отыр», – деді.
Айта кетейік, 2024 жылдың қорытындысы бойынша Қазақстанда Балалардың әл-ауқаты индексі тұрақты өсім көрсетіп, орташа республикалық көрсеткіш 58,6 балға жетті. Бұл өткен жылмен салыстырғанда 2,5 пунктке жоғары.
