Қазақстанда 2026 жылдан бастап салық саясатына маңызды өзгерістері енгізілмек. Денсаулық сақтау министрлігі жаңа Салық кодексін жүзеге асыру аясында медициналық қызметтер мен дәрілік препараттарды қосылған құн салығынан босатуды көздейтін Үкімет қаулысының жобасын дайындады, деп хабарлайды Qazyr.kz
Жобаға сәйкес, кепілдендірілген тегін медициналық көмек және міндетті әлеуметтік медициналық сақтандыру жүйесі шеңберінде көрсетілетін қызметтер мен берілетін дәрілер ҚҚС төлеуден босатылады. Бұл шара сирек кездесетін және әлеуметтік маңызы бар ауруларды емдеу, диагностикалау, алдын алу және оңалту саласына қатысты болмақ.
Мұндай бастама пациенттерге қосымша қаржылық ауыртпалықсыз медициналық көмек алуға мүмкіндік беріп, медициналық ұйымдар үшін де салықтық жеңілдік тудырады. Сонымен қатар, дәрілік заттарды – әсіресе сирек және әлеуметтік маңызды ауруларға арналған препараттарды – импорттау мен сатуға дейінгі кезеңде де ҚҚС алынбайды.
Бұл шешімнің басты мақсаты – пациенттерді қолдау, отандық фармацевтикалық компанияларға қолайлы жағдай жасау және медициналық ұйымдардың қаржылық тұрақтылығын арттыру болып табылады.
