Алматы облысында оқушылардың патриоттық рухын нығайту және болашақта құтқарушы мамандығына қызығушылығын арттыру мақсатында жаңа кадет сыныбы ашылды. Бұл бастама – жасөспірімдердің азаматтық жауапкершілігін қалыптастыру мен ел қауіпсіздігіне үлес қосуға бағытталған алғашқы қадамдардың бірі деп хабарлайды Qazyr.kz
Сыныптың ашылуына орай арнайы таныстыру күні ұйымдастырылды. Іс-шара барысында қатысушыларға түрлі тәжірибелік көріністер мен таныстырылымдар ұсынылды.
Келушілерге құтқару техникасы мен жабдықтарының көрмесі көрсетілді, ал кинологтар қызметтік итпен бірге жаттығу көрсетілімін өткізді. Сонымен қатар, Капшагай су қоймасында Marlin 830 катерінде судағы қауіпсіздік ережелері мен алғашқы көмек көрсету тәсілдері таныстырылды.
Оқушыларға өрт сөндіру техникасы таныстырылып, арнайы алаңда альпинистік жаттығулар өткізілді.
Бұл күн қатысушылар үшін есте қаларлық әрі шабыт беретін тәжірибе болды. Жаңа кадет сыныбы – құтқарушы мамандығын таңдауға бағытталған маңызды әрі ізгі бастама ретінде бағаланды.
