2025 жылдың желтоқсан айынан бастап Қытайдың Air China әуе компаниясы Чэнду – Алматы бағытында жаңа тікелей әуе рейсін іске қосуды жоспарлап отыр. Бұл туралы Синьхуа агенттігі хабарлады.
Жаңа бағыт бойынша рейстер аптасына екі рет – сейсенбі және сенбі күндері Airbus A320neo ұшағымен орындалады. Ұшу уақыты Чэнду қаласынан Алматыға дейін шамамен 3,5 сағат, ал кері бағытта 5 сағатты құрайды. Бұл транзит арқылы ұшумен салыстырғанда кемінде жеті сағат уақыт үнемдеуге мүмкіндік береді.
Air China өкілдерінің айтуынша, тікелей әуе қатынасының ашылуы әуе көлігінің тиімділігі мен қолайлылығын толық пайдалануға жол ашып, Қытайдың оңтүстік-батыс аймағы мен Орталық Азия елдері арасындағы сауда-экономикалық байланыстарды нығайтуға, сондай-ақ гуманитарлық ынтымақтастықты арттыруға ықпал етеді.
Чэнду – Сычуань провинциясының ең ірі орталығы. Бұл өңірден Қазақстанға экспортталатын көлік құралдары, кондиционерлер және өзге де тауарлар қазақстандық тұтынушылар арасында жоғары сұранысқа ие. Ал Қазақстаннан Қытайға Сычуань провинциясы арқылы феррохром, мырыш концентраты, арпа және өзге де өнімдер жеткізіледі.
Жаңа әуе бағыты екі ел арасындағы сауда айналымын арттырып қана қоймай, туристік және мәдени байланыстардың да дамуына серпін беретіні күтілуде.
