Алматыда жұмысшы мамандардың мәртебесін көтеруге бағытталған «Менің мамандығым — болашаққа бағдар!» байқауы өтті, деп хабарлайды Almaty.tv.
Қаладағы колледждердің бірінің қабырғасында өткен додаға тек «Радиоэлектротехника және байланыс» бойынша білім алып жатқан 7 орта білім мекемесінің студенттері қатысты. Жарыс 7 кезеңнен тұрып, әр қатысушы өз саласының қыр-сырын таныстырды. Бірі — презентация қорғап, өз мамандығының маңызын ұғындырса, енді бірі – сызба сызды, кабель ұштап, цифрлық бағдарламада нақты тапсырмаларды орындады. Ұйымдастырушылар бұл іс-шараны жай бәсеке емес, болашаққа сеніммен қадам басқан жастардың шеберлік алаңы деп атап өтті. Байқау соңында үздік деп танылғандар арнайы марапаттарға ие болды.
«Мақсаты – «Радио электротехника және байланыс» мамандығының деңгейін көтеру. Себебі студенттер көбінесе мамандықты таңдамайды. Бұл маңызды мамандық екенін көрсету», – деді колледж директоры Ерасыл Мамырбеков.
