«Қазіргі заманғы мәдениет орталығы» (ҚМО) «Целинный» ресми түрде 2025 жылдың көктемінде ашылып, көрермендерін қабылдамақшы. Бұл жайында ҚМО өкілдері 27 қаңтарда хабарлады. Бұрынғы кеңестік «Целинный» кинотеатрының ғимаратын қайта құру жұмыстары бес жылға созылды, – деп хабарлайды Qazyr.kz Forbes журналына сілтеме жасап.
«Целинный» жобасының негізін қалаушы – кәсіпкер Қайрат Боранбаев екені көпшілікке белгілі. 2015 жылы кәсіпкерге тиесілі «Алмалы» активтерді басқару компаниясы банктің кепілінде тұрған «Отау Синема» желісінің үш кинотеатрын – «Целинный», «Байқоңыр» және «Алатауды» сатып алғаны есімізде. 2016 жылы «Алатау» кинотеатрының орнына Алматыдағы алғашқы McDonald’s мейрамханасы ашылды (Боранбаев бұл желінің франшизасын басқа компаниясы арқылы басқарған). Ал «Целинныйды» мәдени кеңістікке айналдыру туралы шешім қабылдаған еді.
Қазіргі заманғы мәдениет орталығы «Целинный» 2018 жылы құрылған. Сол жылы ғимаратты қайта құру жұмыстары басталады деп жоспарланған болатын. 2018 жылдың шілде айында Forbes Kazakhstan жазғандай, екі көрме мен презентациядан кейін кинотеатр толық жөндеу үшін жабылған. Жөндеу жұмыстары 2020 жылға дейін аяқталады деп күтілген. «Целинныйдың» бұрынғы келбетін қалпына келтіруді жоспарлады, себебі 2000 жылдардың басындағы жөндеу жұмыстарынан кейін оның ішкі және сыртқы көрінісі өзгерген еді.
2020 жылдың маусымында Алматы қаласының қоғамдық кеңесінде ғимараттың «сәулеттік концепциясы» және ҚМО-ның іс-шаралар бағдарламасы таныстырылды. Жөндеу жұмыстары 2021 жылдың тамызында басталды. ҚМО директоры Жамиля Нұрғалиева сол жылы «Власть» порталына бұл процесс 18 айға созылады деп мәлімдеген. Жаңартылған «Целинныйдың» 2023 жылы пайдалануға берілуі жоспарланған еді.
Алайда ашылу мерзімі қайта өзгеріп, 2025 жылдың көктемі деп белгіленді. Жамиля Нұрғалиева бұл жоба жайында былай дейді: «2018-2021 жылдары жоба бойынша жұмыстар жүргізілсе, 2021-2025 жылдары реконструкция жасалды». Ол ҚМО-да алты жыл ішінде 500-ден астам іс-шара өткізілгенін атап өтті.
ҚМО «Целинныйдың» жобасының сәулетшісі британдық маман Асиф Хан екенін растады. Сонымен қатар, «Целинный» көпфункционалды кеңістікке айналып, көрмелер, перформанстар, концерттер, кино көрсетілімдері мен қоғамдық іс-шараларды өткізу орны болады деп уәде етті.
