Көмкерілген
Күресінде сұм өмір таласының,
Жылтырайды үмітпен қарашығым.
Денің сауда күлімдеп жүргеніңмен,
Фәни менен бақидың арасы мұң.
Арпалысып тағдырдың сынағымен,
Күрсіне алмай кеуде де тынады дем.
Тайталасып тізгінді жіберместен,
Сүрінемін,тұрамын,жылап-күлем…
Әне-міне жетердей арманыма,
Алдаусырап сүйрейді жалған мына.
Жақындасам шыңдарға жеткізбейтін,
Сай келмейді сұңғыла талғамыма.
Ұқпаса да шерімді өң керілген,
Мұңға төзем күлкімен көмкерілген.
Бір керуен алдымнан күтері анық,
Жібектей бақ пен бақыт өңгерілген.
Күресінде сұм өмір таласының,
Жылтырайды үмітпен қарашығым.
Денің сауда күлімдеп жүргеніңмен,
Фәни менен бақидың арасы мұң.
Автор: Біржан Досжан
