Сурет:Qazaqstan.tv
Түркістан облысының Келес ауданында орналасқан Жаңатіршілік және Үшағаш ауылдарының тұрғындары ауыз су тапшылығынан зардап шегуде. Құбыр тартылып, ұңғымалар қазылғанымен, мәселе шешілмей, халық көршілес ауылдардан су тасуға мәжбүр.Бұл туралы Qazyr.kz Qazaqstan.tv-ға сілтеп хабарлайды.
Жаңатіршіліктегі құм аралас су
Жаңатіршілік ауылында қазылған терең ұңғымадан шыққан су талапқа сай болмай отыр. Судың құрамында құмның көп болуы оны тұрмыстық және ауыз су ретінде пайдалануға жарамсыз етеді.
Үшағаштағы тұзды су
Үшағаш ауылында да ауыз су мәселесі ушығып тұр. Қазылған ұңғымадан алынған судың тұздылығы шамадан тыс жоғары болғандықтан, тұрғындар оны пайдалана алмайды. Бұл жағдай ауылдың күнделікті тіршілігіне үлкен кедергі келтіріп отыр.
Әкімдік не дейді?
Келес ауданы әкімінің орынбасары Сүлеймен Жылқыбаевтың айтуынша, қазіргі уақытта Жаңатіршілік ауылындағы екі кубтық фильтрді сегіз кубтық фильтрге ауыстыру жоспарлануда. Бұл жұмыс аяқталғаннан кейін тұрғындарға күніне 3-4 сағатқа су беру мүмкіндігі қарастырылады.
Тұрғындардың күткені – нақты шешім
Екі ауылдың тұрғындары таза ауыз су мәселесінің тез арада шешілуін күтуде. Әкімдік ұсынған жоспар іске асқан жағдайда ғана олардың тұрмысы жақсарып, ауыз суға деген қажеттілігі өтелмек. Алайда бұл мәселенің ұзақ уақыт бойы шешілмеуі халықтың наразылығын тудырып, инфрақұрылымдық жобаларды іске асырудағы кемшіліктерді көрсетіп отыр.
