Арыстық ақсақал мен немересі Республикалық «Батагөй» байқауынан жүлдемен оралды.Бұл туралы QAZYR.KZ Арыс қаласының әкімдігіне сілтеп хабарлайды.
Арыс қаласына қарасты, Ақдала ауылының тұрғыны, 72 жастағы қадірменді қария Жолдасбек Тұрманбетов Алматы облыстық Қазақстан халқы Ассамблеясы жанындағы Ақсақалдар кеңесінің «Батагөй» республикалық байқауында жүлделі үшінші орынды иеленді.
Аталған шара Алматы облыстық Қазақстан халқы Ассамблеясы жанындағы Ақсақалдар кеңесі мен «Алматы облысының ішкі саясат басқармасы» ММ «Қоғамдық келісім және даму орталығы» КММ-нің қолдауымен ұйымдастырылды.
Ұйымдастырушылардың ақпаратына сәйкес, байқаудың мақсаты этномәдени дәстүрлерімізді жаңғырту, насихаттау арқылы ұлттық болмысымызды бекемдеу. Сонымен қатар, қоғамда ақсақалдар институтының рөлін күшейту, жас ұрпаққа халқымыздың баға жетпес бай салт-дәстүрін сіңіру, батаның қадір-қасиетін түсіндіру.
Байқау 3 кезең бойынша өткізілді. 1-ші кезеңде байқауға қатысушы ақсақалдар немерелерімен өздерін таныстыра отырып, кезектесе өздері шығарған бата беру өнерін көрсетті. Алдымен ақсақал батаны бастап, немересі сол батаны жалғастырды. 2-ші кезеңде ақсақалдар экранға шыққан ұлттық салт-дәстүр түрлеріне орай қол жайып, бата қайырады. Ал 3-ші кезеңде қатысушылар байқауды аяқтайтын қорытынды батаны ұсынды. Бұл бата жарысты қорытындылап, қатысушылар мен көрермендерге арналды.
Батаның мазмұны, оның қорытынды мәні және әсерлілігі бағаланды. Әділқазылардың шешіміне сәйкес, аталған байқауда Түркістан облысы, Арыс қаласының тұрғыны Жолдасбек Тұрманбетов жүлделі үшінші орыннан көрінді. Жеңімпаздар арнайы дипломдармен және ақшалай сыйлықтармен марапатталды.
Айта кетсек, республикалық байқауда абырой биігінен көрінген жерлесіміз Жолдасбек Мүбаракұлы ақсақал Арыс, Кентау қалаларында неміс тілі пәнінің мұғалімі, әскери жетекші қызметтерін абыроймен атқарған. 1982 жылдың қыркүйек айынан 2014 жылдың қараша айына дейін Арыс қаласы Ақдала ауылындағы С.Ерубаев атындағы орта мектебінде неміс тілі пәні мұғалімі, әскери жетекші, директордың тәрбие ісін атқарып, 2014 жылы зейнеткерлікке шығады. 2014-2017 жылдары Арыс қалалық ардагерлер кеңесінің хатшысы қызметтерін атқарған.
