2025 жылы Қазақстанда балалардың құқықтарын қорғау жүйесін нығайту мақсатында қамқоршылық және қорғаншылық органдарының қызметкерлері саны 2,5 есеге көбейтіледі. Бұл бастама 2024 жылдың желтоқсанында қабылданған балалардың құқықтарын қорғауға арналған заң аясында жүзеге асырылуда.
Жаңа заң бойынша қамқоршылық органдарының штаттық нормативі алғаш рет заңнамалық деңгейде бекітілді – әрбір 5 мың балаға бір маманнан. Осылайша, қызметкерлер саны қазіргі 303-тен 692 адамға дейін артты, ал 2025 жылға қарай бұл көрсеткіш тағы айтарлықтай ұлғайтылады.
«Бұл – көптеген елдерде теңдесі жоқ бірегей қазақстандық тәжірибе. Енді әрбір маман балалар мен олардың отбасыларымен тығыз жұмыс істеп, қажетті қолдауды уақтылы қамтамасыз ете алады», – деп атап өтті ҚР Оқу-ағарту министрі Ғани Бейсембаев.
Сонымен қатар, ҚР Оқу-ағарту министрлігінің Балалардың құқықтарын қорғау комитеті мен Бала құқықтары жөніндегі уәкіл қамқоршылық органдарының тиімділігін арттыру мақсатында әдістемелік ұсынымдар әзірлеуде. Жаңа шаралар балалар мен олардың отбасыларына көмек көрсетудің қолжетімділігін арттырып, жүйенің сапасын жақсартуға бағытталған.
