Марат Әбдраимұлы Балданбаев – кәсіби тағдырын өндіріс саласымен бірнеше жылға емес, ондаған жылға байланыстырған мамандардың бірі. Ол жастайынан инженер болуды мақсат етіп, Қазақ химия-технология институтына оқуға түсті. Инженер-технолог мамандығын алып, 1988 жылы Шымкент мұнай өңдеу зауытында еңбек жолын бастап, содан бері осы ұжымда қызмет етіп келеді.
30 жылдан астам уақыт бойы тазалау қондырғылары цехында еңбек етті: алдымен тауар операторы, кейін 2021 жылдан бері инженер-технолог қызметін атқарып жүр. Жылдар бойғы адал еңбегі елеусіз қалған жоқ: зауыттың 30 жылдығына орай «ҚазМұнайГаз» компаниясының Құрмет грамотасымен, 2022 жылы мұнай-газ саласындағы еңбегі үшін төсбелгімен марапатталған.
«Мұнай саласы — Қазақстан экономикасының тірегі. Бұл сала елге тек жанармай мен экспорттық табыс қана емес, миллиондаған адамға тұрақты жұмыс беріп отыр. Мен үшін бұл бос сөз емес — бүкіл өмірімді зауытқа арнадым. Жыл өткен сайын саланың қалай дамып, технологиялық жағынан жаңарып жатқанын көріп жүрмін. Біз тек мұнай өңдеп қана қоймаймыз — елдің болашағын қалыптастырып жатырмыз», — дейді Марат Балданбаев.
Оның өміріндегі ең маңызды құндылықтардың бірі — ұрпақтар сабақтастығы. Бүгінде зауытта жұбайы мен екі ұлы да еңбек етеді. «Зауыт — біздің отбасымыздың ажырамас бөлігіне айналды», — дейді ол. Оның еңбек жолы — мамандыққа деген шынайы адалдықтың отбасылық дәстүрге, саланың тірегіне айналуының жарқын үлгісі.
