Бақыт қандай
Қандай екен бақыт деген ,бәтшағар?
Пайдасы не тек тапталып жатса ар?
Бақытсыз боп өтетін де шығармын,
Теңізіне көңілімнің батса зар…
Сұлу ма екен жүзі оның күлетін,
Сырларымды толық қанды білетін.
Суыса да сұсты болып келбеті,
Итке айналып кетпесе екен үретін.
Жо-жоқ,аулақ,кір жұғады жаныма,
Есерлікті енгізбеші қаныма.
Сен күлерсің мазақ етіп шаттанып,
Ал,мен болсам күрсінемін тағы да.
Тағдыр деген сынақтармен шыңдайды,
Зәресі ұшып періште де ымдайды.
Жанарлары жасқа толып аяғы,
Үнсіз ғана жүрегімді тыңдайды.
Сорым ба әлде,
біле алмадым,бағым ба?
Үңілемін үміт болған сағымға.
Тізгіндеймін айуанның толқынын,
Тоқтау айтып бойымдағы ағынға.
Қандай екен бақыт деген ,бәтшағар?
Пайдасы не тек тапталып жатса ар?
Бақытсыз боп өтетін де шығармын,
Теңізіне көңілімнің батса зар…
21.07.2019ж
Біржан Досжан
