Астанадағы азаматтық істер жөніндегі ауданаралық сот бұрынғы Ұлттық экономика министрі Қуандық Бишімбаевтың ата-анасы – Валихан Бишімбаев пен Альмира Нұрлыбекова – өз туыстары Қайрат және Бекзат Кемеловтерге қарсы қозғалған сот ісі бойынша шешім шығарды деп хабарлайды Qazyr.kz
Бұған дейін Бишімбаевтың анасы Бекзат Кемеловті шамамен бір миллион АҚШ долларына тең сомада алаяқтық жасады деп айыптап, ал әкесі – жұбайы тарапынан жала жабу әрекеті болғанын мәлімдеген еді.
Сот процесі барысында Бекзат Кемеловтің бір YouTube арнасының тікелей эфирінде айтқан келесі мәлімдемесі дау тудырды:
«…талапкерлер маған мәйітханаға барып, медициналық сарапшылардан ұлының пайдасына қорытынды алдыруымды сұрады… Бұған олар ірі сома төлеуге дайын болды», – деген ол.
Бұл сөздер Бишімбаевтың ата-анасының арызына себеп болды. Олар осы мәліметтерді ресми түрде теріске шығаруды және әрқайсысы үшін 8 миллион теңгеден моральдық зиян өндіріп беруді сұрады.
Сот лингвистикалық сараптама жүргізіп, Кемеловтің сөздері егер шындыққа жанаспайтын болса, арызданушылардың ар-намысы мен іскерлік беделіне нұқсан келтіретінін анықтады. Алайда жауапкер өз айтқандарының шындық екенін дәлелдей алмады. Осыған байланысты сот оның айтқандарын жалған деп танып, оларды теріске шығаруды міндеттеді. Сондай-ақ, Бишімбаевтардың әрқайсысына 100 мың теңгеден моральдық өтемақы төлеуге үкім шығарды.
Іс бойынша шешім әлі заңды күшіне енген жоқ. Дегенмен, талапкерлердің адвокаты Ерлан Газымжанов бұл шешімге шағым түсірілмейтінін мәлімдеді:
«Соттар моральдық зиян үшін өте төмен өтемақы белгілейтін тәжірибе бар. Бірақ бұл жерде мәселе ақшада емес – маңыздысы, жалған ақпараттың сот арқылы жоққа шығарылғаны», – деді ол.
