Алматы қаласында кешкі уақытта архитектуралық және көше жарықтандыруының сапасын арттыру жұмыстары жалғасуда. Қала әкімі Дархан Сатыбалды кешкі тексеріс барысында жарықтандыру инфрақұрылымының жағдайымен танысып, жаңа орнатылған жарық жүйелерінің жұмысын бағалады деп хабарлайды Qazyr.kz
Жарықтандыру жүйесін жаңарту — жай ғана көркемдік мақсат емес, ол қалалық ортаның жайлылығын арттыруға бағытталған кешенді бағдарламаның маңызды бөлігі. Бұл бағдарлама аясында тұрғындардың қауіпсіздігі мен ғимараттардың эстетикалық келбетін сақтау басты назарда.
Қазіргі таңда 21 ғимараттың сәулеттік жарығы толық орнатылып, Абай және Достық даңғылдары мен Қонаев көшесіндегі нысандарда 1600-ден астам заманауи LED-жарық шамдары іске қосылды. Мұндай шамдар электр қуатын үнемдеп қана қоймай, жарықтың сапасын арттырады.
Сонымен қатар, Төлебаев көшесінде 97 көше шамы жарықдиодты жаңа үлгіге ауыстырылды. Бұл пешеходтар мен жүргізушілердің қауіпсіздігін күшейтіп, энергия шығынын азайтуға мүмкіндік береді.
«Самал De Luxe» тұрғын кешенінде де 664 жарық шамы орнатылып, кешеннің сәулеттік ерекшелігін айшықтай түсті.
Әкім өз сөзінде қаланың жарықтандыру сапасын арттыру, заманауи әрі энергия үнемдейтін технологияларды енгізу маңызды екенін атап өтті. Жарық жүйесін жаңғырту жұмыстары бұдан әрі де жалғасып, Алматының орталық көшелері мен тұрғын аудандарында толық қамтылмақ.
