Қазақстанда алтын құймаларына сұраныс күрт артты,деп хабарлайды Qazyr.kz тілшісі.
2024 жылы Қазақстанда алтын құймаларының сатылымы айтарлықтай өсті. Ұлттық банк деректеріне сәйкес, алтын бағасының қымбаттауы салдарынан халықтың құйма сатып алу сұранысы артқан. Биыл Ұлттық банк банктер мен айырбастау орындарына 47 мыңнан астам алтын құйма (1,7 тонна) сатқан, бұл өткен жылмен салыстырғанда 22 пайызға жоғары.
Алтын құймаларын сатып алу бойынша халықтың белсенділігі одан да жоғары. Олар 71 мыңнан астам алтын құйма (2,5 тонна) сатып алған, бұл бір жыл бұрынғы көрсеткіштен 83 пайызға көп.
Алтын құймаларының ішінде ең танымал түрі 10 граммдық құймалар болып табылады (барлық сатылымның 25 пайызы). Одан кейін 5 граммдық және 100 граммдық құймалары келеді (әрқайсысы 22 пайыз). Аз салмақты құймаларды сақтау мен қайта сату ыңғайлы болғандықтан, олар жиі таңдалады.
Алтын құймаларын қазіргі таңда Halyk Bank, «Еуразиялық банк», Jusan Bank, «Банк ЦентрКредит» және кейбір айырбастау орындарынан сатып алуға болады.
Сарапшылардың пікірінше, алтынның құнының өсуі (унциясы 2800 АҚШ доллары, жыл басынан бері 39 пайызға қымбаттаған) халықты алтын құймаларын сатып алуға ынталандырып отыр.
