Жан досым!
Сырласайық, келші маған.
Жасыңды жасыршы тез тамшылаған.
Мен сені
Жаладан да,
Жазадан да,
Құмнан алтын алғандай аршып алам!
Қатігездеу бұл кездің адамдары,
Кейбірінің көңілі қараңғы әлі.
Қызғаныштан құтырып жанарлары
Сені ұнатпай жүретін әлсіз жандар
Жеп қоярдай қарайды маған бәрі!
Елемеймін,
Оларға жаза — мұным.
Жанталасқан жандардың азабы мың.
Сен де елеме!
Сенемін негізі мен,
Тұман басқан қиянат теңізінен
Алып шығар ақ желкен тазалығың!
