Алматы қаласында Қазақстан полициясы күніне орай экологиялық акция басталды. Бұл шара республикалық “Заң және тәртіп” айлығы аясында 1–30 маусым аралығында өтеді деп хабарлайды Qazyr.kz
Акцияның негізгі мақсаты — азаматтардың қоршаған ортаға ұқыпты қарау мәдениетін қалыптастыру, аңшылық пен су жағалауларын қоқыстан қорғау, сондай-ақ табиғатты сақтау ісіне қоғамның жауапкершілігін арттыру.
Экологиялық шара барысында Алматы қаласы Полиция департаментінің қызметкерлері мемлекеттік органдардың, аңшы-құмарлар мен балықшылар қауымдастықтарының, сондай-ақ азаматтық қарумен жұмыс істейтін ұйымдардың қолдауымен тұрғындармен кездесулер өткізді. Бұл кездесулерде табиғат аясындағы мінез-құлық ережелері түсіндірілді, ал табиғат аясындағы сенбіліктер арқылы аңшылық аймақтары мен су қоймалары тұрмыстық қалдықтардан тазартылды.
— 2025 жыл ІІМ жүйесінде Профилактика жылы болып жарияланды. Біздің мақсатымыз — тек құқық бұзушылықты анықтау емес, оның алдын алу, азаматтардың заңға және қоршаған ортаға деген құрметін арттыру. Табиғаттың тазалығы — бұл да қауіпсіздіктің бір бөлігі. Акцияға белсенді қатысқан барлық азаматтарға алғысымызды білдіреміз. Осындай бастамалар дәстүрге айналып, “Закон және тәртіп” идеясын қолдаушылар қатарын көбейтеді деп сенеміз, — деді Алматы қаласы Полиция департаменті Әкімшілік полиция басқармасы бастығының орынбасары Дархан Айымбетов.
Полиция қызметкерлері аңшыларды, балықшыларды және табиғатқа бейжай қарамайтын барлық азаматтарды табиғатты қорғауға өз үлесін қосуға шақырды.
