Өзбекстан астанасы Ташкентте мемлекеттік қызметкерлер үшін ұлттық киім кию ережесі енгізіледі. Бұл шешім 21 қаңтарда Ташкент хокимі Шавкат Өмірзақовтың қолдауымен қабылданған жаңа шешіммен бекітілді. Жаңа құжаттың мақсаты – ұлттық құндылықтарды насихаттау және мәдениеттің бірегейлігін нығайту.Бұл туралы Qazyr.kz хабарлайды.
Құжатқа сәйкес, Ташкентте ұлттық бірегейлікті насихаттайтын арнайы жұмыс тобы құрылып, «Ұлттық Ташкент» жобасы іске қосылды. Осы жобаның аясында бірнеше маңызды шаралар жүзеге асырылады. Әр жұма сайын мемлекеттік мекемелер мен ұйымдардың қызметкерлері үшін ұлттық киім кию міндетті болады.
Сонымен қатар, мемлекеттік қызметкерлер мен хокимиаттар қызметкерлеріне жұмыс күндері ұлттық киім кию ұсынылады. Мәдени шаралар ретінде ұлттық киімдер көрмесі, ұлттық билер мен әндер конкурстары ұйымдастырылып, жеңімпаздарға сыйлықтар мен дипломдар табыс етіледі.
Бұл шаралар Өзбекстанның мәдени мұрасын сақтап, ұлттық бірегейлікті дамытуға бағытталған маңызды қадам ретінде қабылданып отыр.
