Түркістан облысы әкімінің орынбасары Нұрбол Тұрашбеков Сарыағаш және Келес аудандарындағы шаруалармен кездесу өткізіп, олардың көкейкесті мәселелері мен ұсыныстарын тыңдады. Кездесуде өңірдегі ауыл шаруашылығын дамытуға қатысты бірқатар маңызды мәселелер талқыланды.
Көтерілген мәселелер
Кездесу барысында шаруалар жеңілдетілген пайызбен несие алу, тыңайтқыш пен жанар-жағармайға өтінім беру кезінде туындайтын қиындықтар, ағын су тапшылығы мен су арналарының жағдайы туралы мәселелерді көтерді.
Облыстық ауыл шаруашылығы басқармасы басшысының орынбасары Ермұхан Құралбеков агроөнеркәсіп кешенін дамытуға арналған жеңілдетілген несиелер мен мемлекеттік қолдау шараларының тәртібін түсіндіріп, қолжетімді мүмкіндіктер туралы ақпарат берді.
Атқарылған жұмыстар
Сарыағаш ауданының әкімі Арман Абдуллаев 2024 жылы атқарылған жұмыстар туралы баяндады. Аудан аумағындағы «Құлтума», «54-тармақ», «Сифон» каналдары мен қашыртқыларына қаржы бөлініп, жөндеу жұмыстары аяқталған. «Тұран-су» мекемесі арқылы алынған техникалардың көмегімен 172 шақырымға жуық 56 су нысаны механикалық тазалаудан өткізілген.
Келесі қадам ретінде «47-тармақ» каналына қосымша су жеткізу үшін жөндеу жұмыстары басталған. Сондай-ақ, Сарыағаш ауданының Құркелес, Көктерек, Тегісшіл және Келес ауданының Біртілек ауылдық округтеріндегі «Шошым» және «Шаншар-құлақ» каналдарын күрделі жөндеуден өткізуге қатысты жобалар мемлекеттік сараптамадан өткен.
