Жітіқарада бес баласынан айырылған ана сотталды,деп хабарлайды Qazyr.kz.
Қостанай облысы, Жітіқара ауданы. Өрт қауіпсіздігін сақтамау салдарынан бес баласынан айырылған анаға қатысты қылмыстық іс қаралып, сот үкімі шықты.
Оқиға қалай болды?
Сот материалдарына сәйкес, анасы балаларын үйде қараусыз қалдырып, үлкен ұлына үйдің іші салқындаған жағдайда пеш жағуды тапсырған. Баланың отын, көмір және тұрмыстық қалдықтарды пайдаланып, пеш жағуы өрттің басталуына себеп болды. Ол пештің жанында жатқан пластикалық бөтелкедегі белгісіз сұйықтықты қолданған, бұл жалынның күшеюіне және өрттің таралуына әкелді. Өрттің салдарынан бес бала қаза тапты.
Сот шешімі қандай болды?
Сот әйелді Қазақстан Республикасының Қылмыстық кодексінің 292-бабының 3-бөлігі (абайсызда бірнеше адамның өліміне әкеп соқтырған өрт қауіпсіздігі ережелерін бұзу) бойынша кінәлі деп танып, 5 жылға бас бостандығынан айыру жазасын тағайындады. Алайда, сот Қылмыстық кодекстің 74-бабы негізінде оның жазасын орындауды кейінге қалдыру туралы шешім қабылдады, өйткені сотталушының жас баласы бар.
