Астанада халықаралық сауда мен бизнесті дамытуға арналған қытай көпфункционалды орталығы ашылады. Бұл орталық тауарларды таныстыру, іскерлік келіссөздер жүргізу, сауда мәмілелерін рәсімдеу және консалтингтік қызмет көрсету сияқты кең ауқымды қызметтер ұсынатын болады.Бұл туралы Qazyr.kz тілшісі хабарлайды.
Бұл бастама Нанкин қаласындағы «Орталық Азия – Цзянсу» сауда орталығының сәтті тәжірибесіне негізделген. Ол жерде қазақстандық компаниялар өз өнімдерін танытып қана қоймай, Douyin платформасы арқылы тауарларын сәтті сатады. Орталық ашылғаннан бері 600 мың юаньға тауар сатылған.
ҚР Сауда министрі Арман Шаққалиевтің айтуынша, жаңа орталықта сауда павильоны, мәдени орталық және Jiangsu SOHO Holdings Group Co. Ltd кеңсесі болады. 2025 жылдың мамыр айында Астанада Цзянсу провинциясының экспорт-импорт көрмесі өтеді, бұл осы жобаның бір бөлігі болмақ.
Қазақстан бұл жобаны жан-жақты қолдайды. Бұл Қытаймен сауда-экономикалық байланыстарды нығайтудағы маңызды қадам саналады. 2024 жылдың 11 айында Цзянсу провинциясымен тауар айналымы екі есе өсіп, $2,66 млрд-қа жетті. Жалпы, Қазақстан мен Қытай арасындағы сауда айналымы $27,1 млрд құрап, оның ішінде экспорт көлемі $13,5 млрд болды.
