Мәскеуде ТМД елдерінің мәдениет пен медиа саласына арналған «Мәдениет. Медиа. Цифр» форумы өтті. Жиынға медиа, IT, маркетинг, PR және кино саласының кәсіби мамандары қатысты.
Форумға Қазақстан атынан «Шатыр тұрғындары» фильмінің авторы Гүлшат Смағұлова қатысты. Режиссер өз туындысы туралы айтып, фильм Алматының болмысын, қаладағы күнделікті өмірдің көңіл-күйін жеткізетінін атап өтті. Оның айтуынша, оқиғаны табиғи және шынайы жеткізу арқылы әлеммен тілдесуге болады.
Іс-шара медиа мен технологияның өнерге қалай жаңа серпін беріп жатқанын айқын көрсетті. Форум барысында медиа кеңістіктің өзгеруі, блогерлердің ықпалы, цифрлық құралдардың даму үдерісі және ТМД елдерінің креативті саладағы ынтымақтастығы кеңінен талқыланды.
