Бүгінде аграрлық секторды мемлекеттік қолдаудың негізгі құралдарының бірі – жеңілдетілген несиелеу бағдарламасы. Бұл бағдарлама агро сала өкілдеріне өндірісті нығайту, өңдеу және ауыл шаруашылығы инфрақұрылымын дамыту үшін қолжетімді қаржылық ресурстар алуға мүмкіндік береді.
Мемлекет басшысы былтырғы Жолдауында атап өткендей, ауыл шаруашылығы саласында тікелей субсидиялаудан кезең-кезеңімен қолжетімді несиелеуге көшу – маңызды міндеттердің бірі. Бұл бюджет қаражатының тиімділігін арттырумен қатар, агробизнес үшін тұрақты қаржылық экожүйе қалыптастыруға жол ашады. Биыл өңдеу өнеркәсібі мен агроөнеркәсіптік кешенді дамыту бағдарламасы аясында жеңілдетілген қаржыландыру көлемі жылдық 5% мөлшерлемемен 700 млрд теңгеге дейін межеленген, деп хабарлайды ҚР Ауыл шаруашылығы министрлігі.
Қаражат алты арна арқылы бөлінеді: «Аграрлық несие корпорациясы» АҚ, екінші деңгейлі банктер, микроқаржы ұйымдары, өңірлік инвестициялық орталықтар, несиелік серіктестіктер және әлеуметтік-кәсіпкерлік корпорациялар. Қазіргі таңда 7,5 мыңнан астам ауыл шаруашылығы тауар өндірушісі 501,5 млрд теңге қаржыландырылып, 8,1 млн гектар егістік қамтылды. 2025 жылғы 1 қазаннан 2026 жылғы егіс науқанын ерте қаржыландыруға өтінімдер қабылдануда.
«Даму» қоры арқылы 232,1 млрд теңгеге 1338 кепілдеме беріліп, шағын және орта шаруашылықтардың қаржыға қолжетімділігі артты. Ауыл шаруашылығы техникасын жеңілдетілген лизингке беру көлемі 450 млрд теңгеге дейін жеткізіледі; 2025 жылы 220,4 млрд теңгеге 8 635 техника сатып алу жоспарланды.
Өңдеуші кәсіпорындарды айналым қаражаты үшін жеңілдетілген несие және тікелей субсидиялау тетігі іске асырылуда. «Аграрлық несие корпорациясы» АҚ 5%-дан аспайтын мөлшерлемемен несие береді, 57 млрд теңгеге 114 жоба қаржыландырылды. Мал шаруашылығы үшін 50 млрд теңге көлемінде жаңа жеңілдетілген несие бағдарламасы іске қосылды.
Инвестициялық жобаларды жеңілдетілген несие арқылы қаржыландыру 2023–2025 жылдары 400 млрд теңгеге жуық қаражатқа 235 жобаға жол ашты, оның ішінде сүт-тауарлы фермалар, бордақылау кешендері, жылыжайлар, құрамажем өндірісі және су үнемдеу жобалары бар. Мемлекеттік қолдау әрбір теңгеге жеке инвестиция тартуды қамтамасыз етеді.
Осы бағдарламалар ауыл шаруашылығының айналым қаражатын қамтамасыз етіп қана қоймай, инвестициялар мен импортты алмастыруға ықпал етіп, заманауи фермалар мен өңдеу қуаттарын дамытуға және ауылдық аумақтардың тұрақты дамуына септігін тигізеді.
