Алматыда «Қайрат» пен «Астана» командалары арасындағы кездесу тек спорттық тартысымен емес, жанкүйерлер мәдениетінің жаңа қырын көрсетуімен де ерекшеленді, деп жазады Qazyr.kz.
Ойын басталысымен стадиондағы атмосфера бірден сезілді. Трибуналар лық толып, мыңдаған жанкүйер бір ырғақпен командасын қолдады. Әрбір шабуыл, әрбір қауіпті сәт эмоцияға толы өтті. Алаңдағы ойын мен трибунадағы қолдау өзара үйлесіп, нағыз футбол мерекесінің көрінісін қалыптастырды.
Кездесу барысында экологиялық жауапкершілікке де ерекше назар аударылды. «Таза Қазақстан» бастамасы аясында ұйымдастырылған шара көрермендерге бұқаралық іс-шараларда тазалық сақтау мәдениетінің маңызын нақты көрсетті. Мұндай қадам спорт пен қоғамдық жауапкершілікті қатар алып жүрудің тиімді үлгісіне айналып отыр.
Матч аяқталғаннан кейін стадионда бірден тазалық жұмыстары басталды. Еріктілер іске кірісіп қана қоймай, жанкүйерлердің өзі де бұл бастаманы қолдады. Көптеген көрермен трибунада қалған қоқысты жинауға өз еркімен атсалысты. Осындай ортақ әрекет нәтижесінде стадион аумағы қысқа уақыт ішінде толық ретке келтірілді.
Ұйымдастырушылар мұндай тәжірибе қоғамда жауапкершілік мәдениетін қалыптастыруға ықпал ететінін атап өтті. Аталған матч тартысты ойынмен ғана емес, жанкүйерлердің ауызбіршілігімен де есте қалды. Қолдау мен тәртіп қатар жүргенде спорттық мәдениет жаңа деңгейге көтерілетіні айқын көрінді.
