Абай облысының Үржар ауданында болған қайғылы жол апаты салдарынан үш бала көз жұмды, тағы үшеуі ауыр жарақат алды. Бұл туралы полиция департаменті хабарлады.
Алдын ала мәліметке сәйкес, қарт жүргізуші басқарған Toyota маркалы көлік рөлге ие бола алмай, жол жиегінде ойнап жүрген балаларға соғылған. Қайғылы оқиға балалардың үйлерінің қақпасы маңында, автожолдан шамамен 10 метр қашықтықта болған.
Жол-көлік оқиғасы салдарынан үш бала оқиға орнында қаза тапты. Тағы үшеуі ауыр халде аудандық ауруханаға жеткізіліп, дәрігерлердің бақылауына алынды. Облыстық денсаулық сақтау басқармасының мәліметінше, жараланған балаларға барлық қажетті медициналық көмек көрсетілуде.
Президент Қасым-Жомарт Тоқаевтың тапсырмасымен зардап шеккен балаларға көмек көрсету үшін Нұр-Сұлтаннан арнайы медициналық бригада жіберілді. Оның құрамында реаниматолог, нейрохирург және травматолог бар. Дәрігерлерді Абай облысына ҚР Қорғаныс министрлігінің әскери-транспорттық ұшағы жеткізді.
Облыс әкімдігінің мәлімдеуінше, қайғылы жағдайдан қаза болған балалардың отбасыларына жерлеу рәсімін ұйымдастыруға, сондай-ақ психологиялық және материалдық тұрғыдан көмек көрсетіледі.
Оқиға орнына арнайы жұмыс тобы жіберіліп, жағдай облыс басшылығының ерекше бақылауына алынды.
