Қазақстан Республикасының Премьер-министрі Олжас Бектенов сирек кездесетін металдар саласын дамыту жөнінде кеңес өткізді. Бұл шара Мемлекет басшысының Үкіметтің кеңейтілген отырысында берген тапсырмаларын орындау аясында жүзеге асып отыр.
Кеңеске Президенттің экономикалық мәселелер жөніндегі көмекшісі Қанат Шарлапаев, өнеркәсіп және құрылыс министрі Ерсайын Нағаспаев, «Самұрық-Қазына» қорының басқарма төрағасы Нұрлан Жақыпов және «Қазатомөнеркәсіп» ұлттық компаниясының өкілдері қатысты.
Отырыста жұмыс істеп тұрған өндіріс орындарын жаңғырту, геологиялық барлау ауқымын кеңейту, заманауи өңдеу технологияларын енгізу және ғылыми-зерттеу базасын дамыту мәселелері талқыланды.
Өнеркәсіп және құрылыс министрлігінің деректеріне сәйкес, Қазақстан металлургия саласында сирек металдардың үлесі 2,4%-ды құрайды. 2018 жылдан бері мемлекет тарапынан салаға 67 млрд теңге қаржы бөлінген. Қазір жалпы аумағы 100 мың шаршы шақырымды қамтитын 25 учаскеде геологиялық зерттеу жұмыстары жүргізілуде. 2024 жылы 38 перспективалы учаске анықталды.
Қазақстанда бүгінде бериллий, тантал, ниобий, скандий, титан, рений, осмий өндірілсе, қосымша галлий мен индий алу технологиялары бар. Алдағы уақытта батарея материалдарын, ыстыққа төзімді қорытпаларды, жартылай өткізгіш материалдарды және тұрақты магниттерді өндіру басым бағыттарға айналмақ.
2024–2028 жылдарға арналған кешенді жоспар жүзеге асырылып жатыр. Соның ішінде «Жезқазғанредмет» кәсіпорнының сирек металдар цехын жаңғыртуға қаржы бөлінді. Сондай-ақ инвесторлар үшін геологиялық ақпаратқа қолжетімділік қамтамасыз етілді.
Кеңес қорытындысында Премьер-министр салаға қатысты нақты тапсырмалар берді. Ол геологиялық зерттеулерді жеделдетіп, техногендік минералдық түзілімдерді есепке алу мен аккумулятор материалдарын өндіруді дамытуға ерекше назар аудару қажеттігін атап өтті. Сонымен қатар сирек металдар бойынша өңірлік зерттеу орталығын құру жұмыстары басталмақ.
Сарапшылардың айтуынша, қазіргі таңда әлемдік нарықтағы сирек металдарға сұраныс жыл сайын 30%-ға өсіп келеді. Бұл Қазақстан үшін жаңа мүмкіндіктер ашып отыр.
