Алматы музейінде Халықаралық әйелдер күніне орай «Мен қазақ қыздарына қайран қалам» атты ерекше көрме ашылды. Әйелдердің ұлттық өнер мен мәдениеттегі айрықша орнын насихаттауды көздеген шараның салтанатты ашылуы 5 наурыз күні өтті.
Экспозицияға Алматы музейінің қорынан алынған қазақ мәдениеті мен өнерінің дамуына зор үлес қосқан танымал тұлғалардың сирек кездесетін жәдігерлері қойылған. Келушілер сахна өнерінің аңызға айналған жұлдыздары Хадиша Бөкеева, Роза Бағланова, Бибігүл Төлегенова, Роза Жаманова, Мәдина Ералиева және Сәуле Жанпейісованың шығармашылық мұрасымен жақынырақ таныса алады. Көрмеде олардың жеке заттары, сахналық және концерттік костюмдері, архивтік фотосуреттері мен құжаттары бар.
Әсіресе, ұлттық сахна өнерінің қалыптасу кезеңдерін бейнелейтін концерттік киімдер мен сахналық костюмдерге ерекше назар аударылған. Сонымен қатар сирек кездесетін архивтік құжаттар мен фотосуреттер арқылы көрнекті өнерпаздардың өмірі мен шығармашылық жолы тереңінен баяндалады.
Көрменің басты мақсаты – қазақ мәдениетінің дамуына үлес қосқан әйелдердің рөлін, олардың өнерге деген адалдығы мен рухани күш-жігерін көрсету. Бұл экспозиция қазақ қыздары мен әйелдерінің ұлттық өнер мен мәдениетті дамытудағы орны ерекше екенін тағы бір мәрте дәлелдейді.
Көрменің ашылуына мәдениет және өнер қайраткерлері, зиялы қауым өкілдері, БАҚ өкілдері, студенттер мен қала тұрғындары қатысты. Жиналғандар шараның маңыздылығын атап өтіп, отандық өнер мен мәдениет тарихында әйелдердің алар орны туралы кеңінен пікір алмасты.
Аталған көрме Алматы музейінде 12 наурызға дейін жалғасады.
