Алматы қаласында жергілікті климатқа бейімделген ағаш пен бұта көшеттерін өсіруге арналған алғашқы ірі орман тәлімбағы ашылады деп хабарлайды Qazyr.kz
Мамандар бұл бастаманы оңтүстік астананың экологиясын жақсартудағы стратегиялық маңызды қадам деп санайды.
Қазіргі таңда қалада жергілікті табиғат жағдайына сай көшет өсіретін арнайы алаңның болмауы көгалдандыру жүйесінің дамуын тежеп отыр. Соның салдарынан апатты немесе қураған ағаштарды уақытылы ауыстыру, кесілген ағаштардың орнына жаңа тал егу жұмыстары қиынға соғады.
Жаңа питомник осы түйткілді мәселені шешіп, Алматыны сырттан тасымалданатын көшеттерге тәуелділіктен құтқармақ. Қалалық Экология және қоршаған орта басқармасының мәліметінше, сапасыз отырғызу материалдары шығынды көбейтіп қана қоймай, егілген көшеттердің жерсінуіне де кері әсер етеді.
Жүргізілген зерттеу нәтижесінде тәлімбаққа ең қолайлы орын анықталып, аумағы 150 гектар болатын тегіс, топырағы құнарлы жер телімі таңдалды. Мұнда жыл сайын миллиондаған көшет өсіріліп, қаладағы агроорман шаруашылығының инфрақұрылымы кезең-кезеңімен дамытылады.
Жаңа питомник Алматының құбылмалы ауа райына және құрғақшылыққа төзімді ағаш түрлерін өсіруге мүмкіндік береді. Бұл аудандарды көгалдандыруды жеңілдетіп, қауіпті ағаштарды дер кезінде алмастырып, жаңа жасыл желек қорын үздіксіз толықтыруға жол ашады.
Жоба аясында көшет материалын сырттан сатып алуға кететін шығын едәуір қысқарады. Осылайша қала бюджетіне түсетін жүктеме азайып, үнемделген қаражатты басқа экологиялық және әлеуметтік жобаларға бағыттауға мүмкіндік туады.
Экологтардың айтуынша, Алматының урбанизация қарқыны мен климаттың өзгеруі жағдайында мұндай жобалардың уақтылы қолға алынуы аса маңызды. Шаһар енді тек ағаш отырғызумен шектелмей, өз көшеттерін өзі өндіретін деңгейге өтпек.
Бұл ұзақ мерзімді перспективада мегаполистің экологиялық қауіпсіздігін күшейтіп, тұрғындардың өмір сүру сапасын жақсартуға өз үлесін қосады.
Мамандардың пікірінше, тәлімбақ Алматының жасыл желек қорын жоспарлы түрде ұдайы толықтырып отыруға кепіл болады. Сонымен қатар, жергілікті тұрғындардың қаладағы саябақтар мен көше ағаштарының жайқалып өсуіне деген сенімі артады.
Қала әкімдігі мен тиісті басқармалар алдағы уақытта тәлімбақ жобасына жеке инвестиция тарту арқылы агроорман шаруашылығын дамытуды көздеп отыр. Бұл өз кезегінде жаңа жұмыс орындарын ашып, экологиямен қатар экономикаға да оң ықпалын тигізбек.
